Fyritøkan er tí farin undir granskingarsamstarv við norska granskingarstovnin Nowitech um flótandi fundament, ið hóska til havdýpdir uppá meira enn 30 metrar.

- Vit hyggja leypandi at ymsum loysnum og tilfari, sum kunnu lækka útreiðslurnar fyri orku frá framtíðar havvindmyllum. Í hesum sambandi kunnu flótandi fundament vera ein møguleiki, og tí vilja vit vera við í týdningarmiklu granskingini, ið fer fram, sigur Anders Søe-Jensen, sum er stjóri á havmylludeildini hjá Vestas, í einum tíðindaskrivi.

Mest framkomna myllan í heiminum

Fráboðanin kemur beint eftir, at Vestas herfyri sýndi fram eina nýggja útgávu av havvindmylluni hjá fyritøkuni á evropeiskari havvindmyllu-ráðstevnu í Stockhólmi.

Myllan V112-3.0 MW kann sambært Vestas framleiða meira streym enn nøkur onnur mylla í 3 MW-bólkinum.

- Vit eru av álvara við í frálandamarknaðinum og fara at avdúka upp aftur meira á økinum næstu mánaðirnar, sigur Anders Søe-Jensen eisini í tíðindaskrivininum.

Nowitech hevur arbeitt við flótandi fundamentum til vindmyllur í mong ár og hevur millum annað samband við heimsins fyrstu flótandi vindmyllu, sum varð tikin í nýtslu fyrr í hesum mánaðinum.

Norra hevur fingið heimsins fyrstu flótandi vindmyllu

Fráboðanin frá Vestas kemur í kjalarvørrinum av, at Statoilhydro tók heimsins fyrstu flótandi vindmyllu í brúk, 10 kilometrar í ein útsynning úr norsku oynni Karmøy fyri trimum vikum síðani.

Myllan kallast Hywind og er ein 2,3 megawatt vindmylla frá danska Siemens Wind Power. Vindmyllan skal royndarkoyrast í tvey ár til tess at fáa greiði á, hvussu vindur og aldur ávirka konstruksjónina, og hvussu konseptið kann mennast.

Harumframt skal hon eisini avdúka hol í tøknini, sum sambært Statoilhydro framvegis er óbúgvin, og tískil er myllan ikki klár at senda á marknaðin enn.

Hywind vigar 5300 tons, er 65 metrar høg, og diameturin á veingjunum er 80 metrar. Myllan kann flóta á einum dýpi uppá 120-700 metrar.

Nýggj vindmylla frá Siemens

Eisini Siemens er komin á vøllin við eini nýggjari myllu beint nú. Talan er um eina nýggja útgávu av 3,6-megawatt vindmylluni hjá fyritøkuni. Hon hevur ein veingjadiametur uppá 120 metrar. Myllan er útgjørd við kendu tøknini frá SWT-3.6-107, men fer væntandi at framleiða eini 10 prosent meira elektrisitet, skrivar ing.dk.

SEV